Angli, gjyqtari Mike Dean feston golin e Tottenham

Gjyqtari Mike Dean bëhet sërish protagonist në Premier League-n angleze. Tifozët dhe të apasionuarit e futbollit vazhdojnë të pyesin veten nëse arbitri i elitës së futbollit festoi gjatë golit të parë të Tottenham-it, në fitoren 3-1 ndaj Aston Villa-s. Reagimi i 47-vjeçarit në momentin e golit të Mousa Dembele-s ishte si ajo e një tifozi, që ekzaltohet. Imazhet tregonin se si përpara se të drejtonte dorën drejt pikës së bardhë, gjyqtari ngriti duart sikur po festonte.

Reagimi në White Hart Lane solli në vëmendje të tjera episode rreth sjelljes në fushë të Dean. Në vitin 2012, xhaketa e zezë u akuzua se festoi golin e Louis Saha në derbin e Londrës ndërmjet Tottenham dhe rivalëve të Arsenalit. Ai kërceu duke u shfaqur i gëzuar në sfidën e luajtur në “Emirates Stadium”, përpara se topi të prekte rrjetën.

Një tjetër “incident” ndodhi në janar të vitit 2014, kur Mike Dean u shfaq i zhgënjyer që Swansea nuk po e shfrytëzonte avantazhin e tij në sfidën e FA Cup ndaj Manchester United. Vetëm një muaj më pas, arbitri problematik u përfol edhe për ndeshjen e Premier League ndërmjet Aston Villa dhe West Ham. Në atë rast kamerat treguan se Dean reagoi i mërzitur pasi ekipi vendas shpërdoroi një mundësi për shënim./supersport/