Hoeness drejt lirisë, Bild e “kandidon” në krye të Bayernit

Nga kolltuku komod i drejtimit të një prej klubeve më të suksesshëm, në hekurat e ftohtë të qelisë së burgut. Jeta e ish presidentit të Bayernit të Mynihut, Uli Hoeness ka ndryshuar 360 gradë. I dënuar për pastrim parash, 63-vjeçari pa t’i rrëzohej bota mbi shpatulla. Në datën 13 Mars të vitit 2014 ai u dënua me 3 vjet e gjysmë heqje lirie dhe pas disa muajve në qeli, masat ndaj tij u lehtësuan sepse 5 ditë në javë po punon për komunitetin, ndërsa netët duhet t’i kalojë sërish në qeli. Ai nuk është ende një njeri i lirë por kjo nuk e ka penguar t’i vizitojë miqtë e vjetër në qendrën stërvitore të Bayernit.

Aktualisht, në rrugë gjyqësore ai ka apeluar që të lirohet përfundimisht në Marsin e vitit të ardhshëm dhe në rast të aprovimit të kërkesës, natyrshëm lind pyetja: Çfarë do të bëjë ish presidenti i Bayernit si një njeri i lirë? A do të kërkojë të ngjitet sërish në majën drejtuese të klubit bavarez? Sipas të përditshmes “Bild” në daljen e fundit publike gjatë vitit 2014 ai u shpreh se pas daljes së tij do të reflektonte gjatë në lidhje me një vendim të mundshëm për të marrë sërish kontrollin e shoqërisë. Një variant që e përditshmja gjermane zbulon është rikthimi i Hoeness në postin që la dy vjet më parë dhe presidenti aktual, Karl Hopfner mund të marrë drejtimin e Këshillit Drejtues. Gjithsesi, kjo është një hipotezë që mund të diskutohet vetëm në rast se Hoeness shlyen çdo detyrim ligjor në Marsin e vitit të ardhshëm./supersport/